Forsetinn keypti hús í næsta nágrenni við Jón Baldvin

Þrátt fyrir að hafa eldað grátt silfur saman um árabil gæti farið svo að Ólafur Ragnar Grímsson, forseti Íslands, og Jón Baldvin Hannibalsson, fyrrverandi utanríkisráðherra, yrðu nágrannar á næstunni. Í það minnsta fullyrðir fréttavefurinn Pressan að forsetahjónin hafi keypt sér hús að Reykjamel 11 á dögunum. Húsið er í nágrenni við heimili Jóns Baldvins.

Jón Baldvin segir að séu fréttirnar réttar þá lítist honum ágætlega á. „Ef að þetta staðfestir að hann sé tilbúinn til að hætta sem forseti, að þá er ýmislegt á sig leggjandi fyrir það," segir Jón Baldvin. „Mér verður nú fyrst hugsað til þess að við höfum báðir orðið að búa í sama sveitarfélagi áður. Því að teljumst báðir vera Ísfirðingar. Hann er nú einhverjum árum yngri en ég og hann var nú svo mikil pjattrófa þegar hann var yngri að ég man nú lítið eftir honum," segir Jón Baldvin og bætir því við að Ólafur Ragnar sé velkominn í sveitina.

Jón Baldvin og Bryndís, eiginkona hans, hafa búið í Mosfellsbæ síðan 2006. Þá komu þau heim frá Finnlandi, þar sem Jón var sendiherra. Jón Baldvin segist kunna því vel að búa í Mosfellsbæ. „Þetta er nærri því eins og að búa í Finnlandi, þú ert í skógarrjóðri og það er skjósælt," segir Jón Baldvin. Það vanti þó sjávarniðinn. „Og svo hefur það nú verið umkvörtunarefni hjá mér að það væri allt of mikið af íhaldsfólki svona í kring. En það myndi nú lagast eitthvað ef Ólafur Ragnar kæmi," segir Jón Baldvin.

Jón Baldvin segist hafa átt ágætis samskipti við Ólaf Ragnar í gegnum tíðina. „Ég held að við eigum eitt sameiginlegt. Það er að geta greint á um grundvallarsjónarmið án þess að leggja fæð á persónur," segir Jón Baldvin og bætir því við að hann rámi til þess að þeir hafi setið saman í ríkisstjórn með bærilegum árangri í þrjú ár. „Sú ríkisstjórn reyndist vel. Hún var ágæt," segir Jón Baldvin. Hann segir að lokum að hann hafi eitt sinn sagt að umrædd ríkisstjórn hefði verið best mannaða ríkisstjórn lýðveldistímans ásamt fyrri viðreisnarstjórninni.