Árásirnar í Kabúl - íslensk kona á svæðinu

Að minnsta kosti sex eru látnir eftir að uppreisnarmenn talíbana gerðu árásir á bandaríska sendiráðið og höfuðstöðvar fjölþjóðaliðs NATO í Kabúl, höfuðborg Afganistan, í dag. Íslensk kona á svæðinu heldur kyrru fyrir í skrifstofubyggingu nálægt árásarsvæðinu en hún segist ekki vera hrædd þrátt fyrir erfiðar aðstæður.

Það voru nokkrir talíbanar sem tóku yfir háhýsi í borginni í nágrenni við bandaríska sendiráðið og hófu skothríð. Sjá mátti reyk stíga upp nálægt bandaríska sendiráðinu eftir að skotflaug var skotið í átt að því og bandarískar herþyrlur sveima yfir. Þá hafa sjálfsmorðssprengjumenn látið til skarar skríða við flugvöllinn og við höfuðstöðvar Nato.

„Það hófst upp úr klukkan eitt. Þá heyrðum við fyrst skot og þá heyrðist hérna yfir hátalarakerfið að við ættum að koma okkur í skjól. Við höfum verið í skjóli síðan og heyrt sprengjuvörpur og byssuhljóð hérna í kring með einhverjum hléum þó alveg frá því klukkan eitt. Núna er klukkan átta" segir Steinunn Björk Pieper, kynjaráðgjafi hjá höfuðstöðvum Fjölþjóðahersins í Kabúl.

Steinunn starfar á vegum friðargæslunnar ásamt annarri íslenskri konu og hafa þær haldið kyrru fyrir í skrifstofubyggingu ekki langt frá árásarsvæðinu en auk þeirra starfa tveir Íslendingar á flugvellinum í Kabúl og eru þeir óhultir.

„Öllum var sagt að fara í öruggt skjól í einhvers konar byggingar. Við vorum hér bara á skrifstofunum. Svo fórum við í hjálma og vesti,“ segir Steinunn.

Hún segir þær ekki vera hræddar enda umkringdar sérsveitarmönnum en einnig sé adrenalínið í botni.

„Þetta tekur svolítið á okkur. Mér var sagt þar sem þetta er í fyrsta skipti sem ég lendi í svona að seinna í kvöld og á morgun verði ég uppgefin eftir þetta allt saman. En akkúrat núna finnur maður ekki fyrir miklu,“ segir Steinunn.

Þær stöllur vita ekki hversu lengi þær þurfa að dvelja í skrifstofubyggingunni. Enn eigi eftir að tryggja svæðið þrátt fyrir að bardögunum ljúki bráðum.