Sameiningin snýst ekki um Jón Bjarnason

Forsætisráðherra segir fyrirhugaða sameiningu ráðuneyta ekki snúast um Jón Bjarnason heldur um að bæta stjórnarhætti. Hún segir það óskynsamlegt af honum að vera andsnúinn sameiningunni.

Jón Bjarnason heldur enn fast í þá skoðun sína að ekki skuli sameina sjávarútvegs- og landbúnaðarráðuneytinu iðnaðarráðuneytinu, en til stendur að stofna þannig nýtt ráðuneyti atvinnuvega.

„Í þessum ESB-viðræðum sem nú standa þá skiptir miklu máli einmitt sjálfstæði sjálvarútvegs- og landbúnaðarráuneytisins, og sterkur sýnileiki þess. Ég held að þjóðin sé sammála mér í þeim efnum," segir Jón.

Forsvarsmenn stjórnarflokkanna eru þó ekki sammála Jóni.

Er hægt að sameina sjávarútvegs- og landbúnaðarráðuneytið öðru ráðuneyti ef að ráðherra sjálfur er á móti því?

„Auðvitað er það bara sameiginleg ákvörðun að lokum, ríkisstjórnar og þingflokka sem fara með meirihluta hvort að einhverjar slíkar breytingar eru gerðar," segir Steingrímur J. Sigfússon, fjármálaráðherra.

Jóhanna segist bjartsýn á að málið fái framgang.

„Ég finn að það er víðækari stuðningur við það en bara hjá stjórnarflokkunum og sem betur fer eru menn að átta sig á því að þetta mál snýst ekki um Jón Bjarnason heldur snýst það um bætta stjórnarhætti hér í stjórnsýslunni og í stjórnarráðinu," segir Jóhanna.

Steingrímur tekur í sama streng

Þannig að það er ekki útilokað að það sé hægt að gera það þrátt fyrir hans andstöðu?

„Nei, það hefur ekkert verið útilokað eða hætt við að halda áfram að skoða skipulag innan stjórnarráðsins, það hefur ekki verið.. En við tökum bara eitt skref í einu," segir Steingrímur.

Jóhanna virðist ekki hafa miklar áhyggjur af því hvort Jón styður sameiningu ráðuneytað eða ekki.

En segjum sem svo að hann haldi fast í afstöðu sína, er þetta hægt?

„Þá gerir hann það bara," segir Jóhanna.

Hún heldur þó í vonina um að hann skipti um skoðun.

„Við skulum bara vona það og sjá hvað setur hvort hann verður með eða ekki . Það væri mjög óskyndamlegt af sjávarútvegsráðherra að vera það ekki því við erum að tala um að taka á vandamálum sem Rannsóknarnefndin taldi að þyrfti að taka á," segir Jóhanna.