Gylfi lék í 45 mínútur í 1-0 sigri Hoffenheim

Gylfi Sigurðsson lék í 45 mínútur með Hoffenheim í 1-0 sigri liðsins gegn Frankfurt í dag í þýsku 1. deildinni. Gylfi kom inná sem varamaður í upphafi síðari hálfleiks en hann hefur aðeins fengið tækifæri í byrjunarliðinu hjá Hoffenheim í 6 leikjum það sem af er tímabilinu.

Alls hefur landsliðsmaðurinn skorað 7 mörk og þar af 2 úr vítaspyrnum. Roberto Firmino skoraði eina mark Hoffenheim á 78. mínútu aðeins fjórum mínútum eftir að hann kom inná sem varamaður.

Hoffenheim er um miðja deild með 40 stig eftir 30 leiki þegar fjórar umferðir eru eftir.