Skipuleggja tónleika fyrir Ólaf Þórðarson

Vinir og samstarfsmenn tónlistarmannsins Ólafs Þórðarsonar hafa ákveðið að standa fyrir tónleikum til styrktar Ólafi síðar í mánuðinum. Ólafur liggur meðvitundarlaus á Grensásdeild Landsspítalans eftir að hafa orðið fyrir alvarlegum höfuðmeiðslum þegar sonur hans réðst á hann í nóvember. Árásin átti sér stað á heimili Ólafs.

Um er að ræða einu tónleikana í ár á fyrirhugaðri Þjóðlagahátíð Reykjavíkur - Reykjavik Folk Festival sem Ólafur kom á laggirnar í fyrra, að því er fram kemur í tilkynningu frá Helga Péturssyni félaga Ólafs í Ríó tríóinu. Ólafur hafði skipulagt mun fleiri tónleika á hátíðinni.

„Vinir Ólafs og samstarfsmenn til margra ára hafa tekið höndum saman og ákveðið að ganga inn í skipulagsvinnu Ólafs og halda tónleika í Háskólabíói undir merkjum hátíðarinnar en að öllu leyti honum sjálfum til styrktar. Hann er einyrki og rekur umboðsfyrirtækið Þúsund þjalir og vann í hlutastarfi í Ríkisútvarpinu Rás 1, en eins og nærri má geta, hefur áfall þetta, þjálfun og endurhæfing framundan, miklar fjárhagslegar afleiðingar í för með sér," segir í tilkynningunni.

Þar segir einnig: „Allir sem vettlingi geta valdið hafa lagst á árar og er óhætt að lofa tónleikagestum frábærri skemmtun. Allir sem koma að undirbúningi, ljósum og hljóðvinnslu, að ekki sé talað um listamennina sjálfa, gefa vinnu sína og hvetja alla til þess að sækja þessa einstöku tónleika."

Meðal þeirra sem fram koma eru Kristján Jóhannsson, Kristján Kristjánsson KK, Bubbi Mortens, Björgvin Halldórsson, Savanna tríóið, Ríó tríóið, Hörður Torfason, Diddú, Óperukórinn og fjöldi óperusöngvara, Egill Ólafsson, Gæðablóðin, Raggi Bjarna og Þorgeir Ástvalds, Gunnar Þórðarson, Guitar Islancio, South River Band, Guðrún Gunnarsdóttir og útvarpsbandið og Örn Árnason. Kynnir verður Þorsteinn Guðmundsson.

Tónleikarnir fara fram í Háskólabíói miðvikudagskvöldið 13. apríl og hefjast klukkan 20. Miðar á tónleikana verða seldir á www.midi.is. Þá hefur verið stofnaður styrktarreikningur fyrir Ólaf - nr. 0326-13-700700 og kennitala 011263-3489.