Reynir Traustason: Ekki sérstaklega undir það búinn að verja gögnin

DV ætlar ekki að fallast á kröfu sýslumanns um að skila gögnum um dótturfélag Landsbankans. Ritstjóri blaðsins segir að um svívirðilega aðför að heimildarmönnum sé að ræða og ekki sé hægt að sjá að Landsbankinn ætli að iðka gegnsærri vinnubrögðum en fyrir hrun.

Sýslumaðurinn í Reykjavík hefur samþykkti í gær lögbann á umfjöllun DV um fjárfestingafélagið Horn, dótturfélag Landsbankans. Telur sýslumaður að gögn um félagið sem blaðið hefur undir höndum, séu viðkvæm trúnaðargögn og því beri blaðinu að skila þeim til sýslumanns. Frestur til þess að verða við því rann út núna klukkan tólf. Þá er þess krafist að blaðið fjalli ekki frekar um málefni félagsins en ekki er farið fram á að fyrri fréttir verði fjarlægðar af vefsíðu blaðsins DV.is.

Reynir Traustason, ritstjóri blaðsins, segist ætla framfylgja lögbanni á frekari umfjöllun blaðsins um félagið. Hins vegar sé ómögulegt að skila gögnunum því þau gætu bent á heimildamann blaðsins í málinu.

„Gögnin fara hvergi. Þetta eru viðkvæm gögn sem gætu bent á heimildarmann. Því getum við ekki orðið við þessu. Mér finnst þetta ein mesta ósvífni sem hefur komið frá sýslumann,“ segir Reynir um málið.

Sýslumaðurinn í Reykjavík að ekki væri hægt að tjá sig um einstök mál og er óljóst hvernig hann mun reyna sjá til þess að úrskurðinum verði framfylgt.

Reynir sagðist ekki vita hvernig sýslumaðurinn hygðist bregðast við og sagðist ekkert sérstaklega undir það búinn að verja gögnin enda liggi þau ekki fyrir framan alla starfsmenn blaðsins heldur séu í fórum eins blaðamanns. Blaðinu sé ekki stætt á að krefja hann um að skila þeim.

„Ef að menn ætla  að reyna að ná gögnunum, þá gerist það bara. En við verðum að standa vörð um þessi gögn. að öðru leyti ætlum við að fara eftir þessum úrskurði.

Reynir segist ekki vita hvað það er í gögnunum sem Landsbankamenn telja að þoli svona illa dagsins ljós og megi ekki tjá sig um fréttirnar. Þeir sem hafi áhuga á málinu geti þó enn fundið þær á vefsíðunni.

„Ég held að það sé bara óbærilegt fyrir þá að það sé veitt innsýn í mál þessa félags, sem er í eigu þjóðarbankans, Landsbankans,“ segir Reynir.