NBA í nótt: Chicago óstöðvandi

Fátt virðist geta stöðvað Chicago Bulls þessa dagana en liðið vann í nótt afar sannfærandi sigur á Utah Jazz, 118-100.

Chicago hefur unnið níu af síðustu tíu leikjum sínum og er aðeins hársbreidd frá Boston sem enn situr í toppsæti Austurdeildarinnar.

Derrick Rose og Luol Deng voru báðir með 26 stig í leiknum í nótt en Chicago náði 20 stiga forystu strax í fyrsta leikhluta. Rose skoraði þá sautján stig.

Chicago setti einnig félagsmet í nótt með því að setja niður átján þriggja stiga mót í leiknum. Það er ekki síst merkilegt afrek í ljósi sögu liðsins en gömlu hetjurnar Michael Jordan og Scottie Pippen voru báðir í stúkunni í nótt.

„Við gerum okkur vel grein fyrir því hversu merkilegt afrek það er," sagði Joakim Noah, leikmaður Chicago.

20 ár eru liðin síðan að félagið vann sinn fyrsta meistaratitil og því voru þeir Jordan og Pippen viðstaddir leikinn ásamt öðrum leikmönnum og þjálfurum úr þessu fyrsta meistaraliði félagsins.

„Við eigum enn langt í land með að ná þeim en við erum að gera okkar allra besta," sagði Deng sem var með sjö fráköst, sex stoðsendingar og þrjá stolna bolta í leiknum.

Al Jefferson var með 33 stig og átján fráköst fyrir Utah en það dugði ekki til.

LA Lakers vann Dallas, 96-91, í toppslag í Vesturdeildinni. Kobe Bryant var tæpur vegna ökklameiðsla en náði að spila og skora sextán stig í leiknum.

San Anotnio vann Houston, 115-108. Tony Parker skoraði 21 stig fyrir San Antonio sem er með bestan árangur allra liða í deildinni.

Miami vann Memphis, 118-85. Dwyane Wade gaf tóninn með því að verja fjögur skot á aðeins 55 sekúndna kafla í upphafi leiksins. Varnarleikur Miami var frábær í leiknum en Wade skoraði alls 28 stig og var með fimm fráköst. LeBron James ksoraði 27 stig og Chris Bosh átján.

Denver vann Detroit, 131-101. JR Smith skoraði 31 stig, þar af 26 í síðari hálfleik.

New Orleans vann Sacramento, 115-103. Chris Paul lék á ný með liðinu í nótt eftir heilahristing og hélt upp á það með því að skora 33 stig auk þess sem hann gaf fimmtán stoðsendingar og tók sjö fráköst.

Atlanta vann Portland, 91-82. Jeff Teague skoraði 25 stig og Jamal Crawford 20.

LA Clippers vann Washington, 122-101. Blake Griffin skoraði 26 stig, öll í fyrri hálfleik.

Milwaukee vann Philadelphia, 102-74. Andrew Bogut skoraði sautján stig fyrir Milwaukee.