Birna í Norræna

Fyrstu háskólatónleikar ársins fara fram í Norræna húsinu í dag og hefjast kl. 12.30. Þar leikur Birna Hallgrímsdóttir á píanó verk eftir Johann Sebastian Bach, Claude Debussy og Frédéric Chopin.

Birna er fædd árið 1982 og hóf píanónám fimm ára að aldri í Tónlistarskóla íslenska Suzuki-sambandsins og síðar Tónlistarskóla Kópavogs. Haustið 2002 hóf hún nám í píanóleik við Listaháskóla Íslands og var Peter Máté kennari hennar. Haustið 2005 var hún skiptinemi við Savonia polytechnic í Kuopio í Finnlandi þar sem kennari hennar var Kirsti Huttunen.

Birna lauk B.Mus.-prófi frá Listaháskólanum vorið 2006 og í nóvember sama ár hlaut hún önnur verðlaun í Epta-píanókeppninni hér á landi. Í desember sama ár hóf hún nám í Royal College of Music í London hjá Ian Jones og Gordon Fergus-Thompson og lauk framhaldsnámi í júlí árið 2009. Nýlega fluttist Birna til Stavangurs þar sem hún stundar nú nám hjá prófessor Håkon Austbø.