Björgunarsveitamenn hræðast Mýrdalsjökul

„Það sem við hræðumst er Mýrdalsjökull," segir Kristinn Ólafsson, björgunarsveitamaður og framkvæmdarstjóri Landsbjargar spurður hvernig gangi með ferðamenn á Fimmvörðuhálsinum. Hann segist minnstar áhyggjur hafa af göngufólki sem gengur upp að gosstöðvunum. Það er þó ísskalt, kuldinn getur farið niður í 20 gráður í mínus með vindkælingu. Að sögn Kristins er þó einfalt að komast áleiðis upp að gosstöðvunum þar sem ferðamenn feta slóð. Því er auðvelt að finna þá ef eitthvað kemur fyrir.

En Kristinn segist hafa meiri áhyggjur af ferðamönnum upp á Mýrdalsjökli enda er jökullinn varhugaverður.

„Við urðum vitni að því að menn voru á krossurum án nokkurs útbúnaðs á jöklinum. Þeir voru ekki einu sinni með bakpoka. Það er algjört glapræði," segir Kristinn en veður er ágætt þrátt fyrir talsverðan kulda. Kristinn segir ferðatæki misvel búin, sumir eru ekki einu sinni með staðsetningatæki að sögn Kristins, en það getur verið stórhættulegt að ferðast um jökulinn án þess að vita hvaða slóð skal fara. Þá sé mönnum veruleg hætta búin þar sem margar sprungur leynast í jöklinum.

„Ef það kemur skafrenningur þá gæti ástandið orðið skelfilegt," segir Kristinn sem vonast til þess að veðrið haldi áfram að vera gott. Ef ekki, þá gætu aðstæður snarbreyst og margir eru illa búnir á jöklinum.

„Mýrdalsjökull er hættulegur og mjög sprunginn, þannig við vonum bara það besta," sagði Kristinn en björgunarsveitin hefur ekki þurft að aðstoða neinn upp á jöklinum enn sem komið er.

Um 400 göngumenn lögðu af stað fyrir hádegi upp á Fimmvörðuháls. Gangan tekur minnsta kosti 12 tíma. Vanur göngumaður sem rætt var við sagði gönguna verulega erfiða. Þá varaði hann við því að ekkert vatn væri að finna upp á hálsinum. Því væri betra að taka með sér nóg af vatni.