Davíð: Ekkert nýtt í skjölunum

Davíð Oddsson, fyrrverandi forsætisráðherra, segir ekkert nýtt vera að finna í tugum skjala sem utanríkisráðuneytið birti í morgun, um aðdraganda þess að Ísland studdi innrás í Írak, vorið 2003.

Utanríkisráðuneytið birti í dag skjöl um stuðning Íslands við innrás Bandaríkjamanna og annarra bandamanna þeirra í Írak, í mars árið 2003.

Össur Skarphéðinsson, utanríkisráðherra, hafði áður upplýst að skjöl í ráðuneytinu sýndu að aðdragandinn að stuðningi Íslands við þetta, hefði átt sér lengri aðdraganda en áður hefði verið talið.

Skjölin eru í heild, segir ráðuneytið, 92 og í allt um 400 blaðsíður, en 67 voru birt í dag. Þarna eru minniblöð frá sendiherrum, uppskriftir af blaðamannafundum, beiðnir til stjórnvalda, minniblöð og fleira.

Í skjölunum sem birtust í dag, segir meðal annars að rétt fyrir innrás, og raunar rétt áður en listi yfir hinar svonefndu staðfestu þjóðir var birtur, hafi stjórnvöld talið það trúnaðarmál, að við værum á listanum. Enn fremur að stjórnvöld hafi ekki gert sér neina grein fyrir því hvað fólst í því að vera á þessum lista. Enn fremur er þarna minnisblað frá þjóðréttarfræðingi, til utanríkisráðherra, sem þá var Halldór Ásgrímsson, þar sem lögmæti innrásarinnar er dregið í efa.

Halldór neitaði að tjá sig um málið við fréttastofu í dag. Davíð Oddsson, fyrrverandi forsætisráðherra, sagði í svari við ítarlegri fyrirspurn fréttastofu, að ekkert nýtt væri í þessu.

25 skjöl eru óbirt. Utanríkisráðuneytið vísar til þess að skjölin varði samskipti við erlend ríki eða séu vinnuskjöl. Heimildir fréttastofu herma að rannsóknarhagsmunir, ráði einnig því að ekki kemur allt fyrir almenningssjónir nú.

Viðbúið er að Alþingi setji í gang rannsókn á tildrögum þess að Ísland lýsti stuðningi við innrásina. Heimildir fréttastofu herma að Alþingi fái óbirtu skjölin, en þeir sem rannsaka málið á vegum þess, eigi eftir að yfirheyra fólk; verra sé að það sama fólk hafi kynnt sér efni hinna óbirtu skjala.