Forlan: Fáum vonandi frið frá eldfjallinu til að fagna

Diego Forlan sagði að Atletico Madrid hafi átt skilið að vinna Fulham í úrslitaleik Evrópudeildarinnar í kvöld.

Forlan skoraði bæði mörk Atletico í 2-1 sigri í framlengdum leik í Hamburg í Þýskalandi.

„Ég held að við gerum okkur ekki fyllilega grein fyrir árangri okkar,“ sagði Forlan. „En það munum við gera að lokum.“

„Við áttum skilið að vinna frá fyrstu mínútu. Mér leið eins og að ég yrði að skora í leiknum og ég naut þess að spila í honum.“

„Njótið vel og lengi,“ sagði hann við stuðningsmenn Atletico. „Ekki skapa neinn usla og á morgun getum við öll fagnað þessu saman ef við fáum frið frá eldfjallinu til þess,“ bætti hann við og átti þar væntanlega við þær raskanir sem hafa verið á flugsamgöngum víða um Evrópu vegna öskudreifingar frá eldgosinu í Eyjafjallajökli.