Boða aukna samvinnu í atvinnumálum

Fréttaskýring: Ríkisstjórn kynnti í gær verkefni til að örva atvinnulíf á Suðurnesjum. Til greina kemur að flytja Landhelgisgæsluna til Keflavíkur og Þróunarfélagið verður eflt. Ekkert er ákveðið um stóriðju eða einkasjúkrahús. Sveitarstjórnarfólk er ánægt með samstarfsvilja stjórnar.

Mögulegt er að Landhelgisgæslan verði flutt til Keflavíkurflugvallar á næstunni og Þróunarfélag Keflavíkurflugvallar getur stóraukið verkefni sín á næstunni. Þetta er meðal helstu atriða sem ríkistjórnin kynnti á blaðamannafundi í Reykjanesbæ í gær. Þar var rætt um hvernig bæta mætti stöðu mála á Suðurnesjum. Hagkvæmnisathugun á flutningi Gæslunnar verður kynnt 1. febrúar næstkomandi.

Þrátt fyrir að stjórnin gæfi lítið út um stöðu ýmissa atvinnumála sem hafa verið í umræðunni, svo sem álver og kísilverksmiðju í Helguvík, flugstarfsemi ECA og nýtt einkarekið sjúkrahús að Ásbrú, voru ráðherrar og sveitarstjórnarfólk jákvæð varðandi framhaldið.

Aðgerðirnar voru samþykktar á fundi ríkisstjórnar í gær en um morguninn hafði stjórnin fundað með fulltrúum sveitarstjórna.

Mikil ólga hefur verið á svæðinu undanfarið þar sem atvinnuleysi er hvergi meira en einmitt þar. Heimamenn hafa því þrýst á stjórnvöld að taka af skarið, sérstaklega í atvinnumálum.

Meðal annarra verkefna sem kynnt voru til sögunnar voru að stofnað verður til samráðsvettvangs ríkisstjórnar og sveitarfélaga til að vinna að málum svæði­sins, stutt verði við klasaverkefni á sviði líforku, sveitarfélögin hafi með sér samstarf í félagsmálum og umboðsmaður skuldara opni útibú á Suðurnesjum. Þá verður einnig stutt við menntunarverkefni á svæðinu.

Jóhanna Sigurðardóttir forsætisráðherra sagði að dregin hefði verið upp glögg mynd af stöðu Suðurnesja.

„Staðan á þessu svæði er með þeim hætti að atvinnumál þarf að taka mjög föstum tökum," sagði Jóhanna.

Steingrímur J. Sigfússon fjármálaráðherra tók undir þau orð og boðaði meðal annars breytingu á skattalögum til að greiða fyrir framgangi gagnavers að Ásbrú og auknum fjárveitingum til Þróunarfélags Keflavíkurflugvallar til að flýta verklegum framkvæmdum við húsakost á svæðinu.

Steingrímur bætti því við að þar myndi fjölgun starfa fyrst koma í ljós. „Strax í vetur ætti það að geta skilað störfum fyrir iðnaðarmenn og fleiri."

Árni Sigfússon, bæjarstjóri í Reykjanesbæ, sagði í lok fundar að hann væri ánægður með vilja stjórnarinnar til að vinna með sveitarfélögunum.

„Það er meira virði heldur en að telja upp hversu mörg störf komi út úr einstaka verkefnum á þessari stundu. Við erum saman á þessu skipi og erum vonandi að róa í sömu átt."