Kyrrsetning eigna Skarphéðins Bergs felld úr gildi

Héraðsdómur Reykjavíkur felldi í dag úr gildi ákvörðun sýslumanns um kyrrsetningu eigna Skarphéðins Bergs Steinarssonar. Um miðjan síðasta mánuð fór skattrannsóknarstjóri fram á að eignir Skarphéðins, Jóns Ásgeir Jóhannessonar, Jóns Sigurðssonar og Hannesar Smárasonar yrðu kyrrsettar. Þeir voru allir í forsvari fyrir FL Group á árunum 2006 og 2007 og grunaðir um refsiverða háttsemi í tengslum við brot félagsins á lögum um virðisaukaskatt.

Sýslumaðurinn í Reykjavík féllst á beiðnina og voru fasteignir og bifreið Skarphéðins í framhaldinu kyrrsettar. Hann fór fram á að kyrrsetning eignanna yrði felld úr gildi og komst héraðsdómur að þeirri niðurstöðu að í lögum um tekjuskatt væri ekki að finna heimild til kyrrsetningar vegna meintra brota á lögum um virðisaukaskatt og því hafi skort lagaskilyrði fyrir því að eignir Skarphéðins væru kyrrsettar.