Bólu-Hjálmar í Þjóðleikhúsinu

Í kvöld og annað kvöld sýnir Stoppleikhópurinn verðlaunaleikritið Bólu-Hjálmar í Þjóðleikhúsinu. Aðeins er um þessar tvær sýningar að ræða. Sýningin hlaut Grímuverðlaunin sem Barna- og unglingaleiksýning ársins 2009.

Höfundar handrits og tónlistar eru þeir Ármann Guðmundsson, Snæbjörn Ragnarsson, Sævar Sigurgeirsson og Þorgeir Tryggvason. Þeir eru allir í Ljótu hálfvitunum. Í verkinu, sem tekur um 50 mínútur í flutningi, er leitast við að kynna Bólu-Hjálmar fyrir nýjum kynslóðum. Grunnskólakrakkar vita sennilega flestir að hann var skáld og þeir sem eldri eru kunna sum ljóðin hans og muna eftir honum af svipmikilli teikningu í gömlu Skólaljóðunum.

Þjóðin hampar honum enn þá sem einu af kraftmestu þjóðskáldum sínum fyrr og síðar. Hann var skapmikill orðhákur sem oft kom sér í vandræði og lenti upp á kant við nágranna sína. Hann var öfundaður og rógborinn. Hann var þjófkenndur og ákærður. Samt virtur og dáður.

Þrír leikarar segja söguna og leika allar persónur, þau Eggert Kaaber, Magnús Guðmundsson og Margrét Sverrisdóttir. Leikritið geymir sýnishorn af kveðskap Bólu-Hjálmars, allt frá því fegursta til andstyggilegustu níðvísna.

Leikstjóri er Ágústa Skúladóttir.

Verkið var frumsýnt 22. maí 2008 í Iðnó. Hefur það síðan verið á leikferð um landið þar sem sýningar fóru fram í grunnskólum og einnig fyrir eldri borgara. Núna gefst almenningi einstakt tækifæri til að sjá sýninguna.

drgunni@frettabladid.is