Þjóðleikhússtjóri keppir við frænku sína og mömmu

„Þetta er bara fjölskylduflokkur," segir Tinna Gunnlaugsdóttir, Þjóðleikhússtjóri.

Tinna er tilnefnd sem besta meðleikkonan á Eddunni fyrir hlutverk sitt í sjónvarpsþáttunum Rétti ásamt móður sinni Herdísi Þorvaldsdóttur og frænku sinni Tinnu Hrafnsdóttur sem báðar léku í Hamrinum. „Þetta er bara ógurlega gaman og það er ljóst að við hljótum allar að vera þarna á eigin verðleikum en ekki vegna vensla," segir hún og hlær. Orð að sönnu því dómnefndin hafði ekki hugmynd um hvað hinir meðlimir hennar ætluðu að kjósa. Þetta er í fyrsta skipti sem þetta gerist, að þrjár kynslóðir

Spurð hvort hún ætli ekki að hrifsa til sín Edduna þrátt fyrir ættartengslin segir Tinna það ekki skipta öllu máli. „Það er bara einn sem vinnur í keppni. En heiðurinn er að vera tilnefndur og þar er jafnt á komið með okkur. Hitt er meira tilviljun hver það er sem lendir í verðlaunasæti."

Hún viðurkennir að tilnefningin hafi komið sér á óvart. „Ég lít ekki á mig sem leikkonu í dag heldur embættismann, þótt auðvitað einu sinni leikkona alltaf leikkona," segir Tinna. „En það var mjög gaman að taka þátt í þessu [Rétti] og vissulega naut ég þess. Leikkonuhjartað er þarna ennþá."

Tinna Hrafnsdóttir, frænka Tinnu og barnabarn Herdísar, er að vonum ánægð með sína tilnefningu og þessa óvæntu samkeppni. „Þetta er mjög ánægjulegt og skemmtileg tilviljun," segir Tinna, sem er að fá sína aðra tilnefningu til Eddunnar. Síðast var hún tilnefnd fyrir aðalhlutverkið í kvikmyndinni Veðramót árið 2007. „Ég er mjög glöð yfir því að vera sýndur sá heiður að fá tilnefningu."

Edduverðlaunin verða afhent í Háskólabíói 27. febrúar.

freyr@frettabladid.is