Tíu lög á aðeins 18 mínútum

„Við erum aðallega að syngja um lífið og tilveruna. Við erum ekkert rosalega pólitískir og ekkert rosalega harðir neitt," segir Almar Daði Kristjánsson, bassaleikari pönksveitarinnar Buxnaskjónar frá Akureyri.

Fyrsta stóra plata sveitarinnar, Nýtt lýðveldi, kemur út í dag á vegum Braks og hefur hún að geyma tíu lög sem eru í sannkallaðri pönklengd, eða aðeins átján mínútur. Fylgir hún í kjölfar hinnar sex laga stuttskífu Þriðja heimsstyrjöldin sem kom út í 74 tölusettum eintökum síðasta vor.

Buxnaskjónar var stofnuð árið 2007 og hefur verið nokkuð dugleg við spilamennsku bæði í heimabænum Akureyri og víðar. Sveitin vakti fyrst athygli síðasta vor þegar hún vann hljómsveitakeppnina Besti byrjandinn sem var haldin í tilefni af AIM-tónlistarhátíðinni á Akureyri. Um svipað leyti óskaði Baldvin Esra hjá Kimi-útgáfunni eftir því að gefa út með þeim stóra plötu. „Okkur bauðst þetta tækifæri og við ákváðum að hoppa á það," segir Almar.

Auk hans eru í sveitinni gítarleikarinn og söngvarinn Þorsteinn Kári Guðmundsson og trommarinn Þorsteinn Sindri Baldvinsson. Þeir eru saman í Menntaskólanum á Akureyri og eru á sautjánda og átjánda aldursári. Þrátt fyrir ungan aldur tóku þeir plötuna upp sjálfir og ætla að fylgja henni eftir með spilamennsku á næstunni, þar á meðal á Brak-kvöldi sem verður haldið í byrjun mars. -fb