Dómsmálaráðherra: Ósamræmi milli dóma

Héraðsdómur Reykjavíkur hefur dæmt lögmanni sem ekki fékk starf héraðsdómara sömu miskabætur og fjórum ungum stúlkum sem var nauðgað voru dæmdar samanlagt í bætur. Dómsmálaráðherra segir ósamræmi á milli dómanna.

Dómurinn féll í Héraðsdómi Reykjavíkur í síðustu viku en þar var Ívar Anton Jóhannsson sakfelldur fyrir að nauðga fjórum ungum stúlkum sem hann kynntist á Facebook. Stúlkunum voru dæmdar samtals 3,5 milljón króna í miskabætur. Sú sem talið var að alvarlegast hefði verið brotið gegn fékk 1.500 þúsund krónur, önnur fékk 800 þúsund og hinar tvær 600 þúsund hvor.

Þetta er sama upphæð og Guðmundi Kristjánssyni hæstaréttarlögmanni voru dæmdar í héraðsdómi í lok apríl, en dómurinn taldi að gengið hefði verið framhjá honum við skipan dómara við Héraðsdóm Norðurlands eystra. Þá var Þorsteinn Davíðsson skipaður dómari þrátt fyrir að Guðmundur hefði verið metinn tveimur hæfnisflokkum ofar.

Í rökstuðningi héraðsdóms segir meðal annars að eðli málsins samkvæmt fylgi því álag að sækja um embætti héraðsdómara, leggja verk sín fyrir dómnefnd og fá álit hennar á lífsstarfi sínu.

Ragna Árnadóttir, dómsmálaráðherra, segist ekki vilja horfa á miskabæturnar sem stúlkunum voru dæmdar og segja að það sé sama upphæð og í máli Guðmundar, því hver og ein stúlka hafi orðið fyrir misgjörð og hver og ein fái bætur.

„Óneitanlega vakna upp hugrenningar um það við hvað miskabætur eru miðaðar og mér finnst vera full ástæða til skoða þetta," segir Ragna vísar til umræddra dóma. „Mér finnst ekki vera samræmi þarna á milli."

Réttargæslumenn stúlknanna vildu ekki tjá sig um málið í samtali við fréttastofu. Önnur þeirra benti þó á að ríkið tryggi einungis miskabætur sem þessar að hámarki 600 þúsund krónur og því sé ólíklegt, eins og staðan sé nú, að skjólstæðingur sinni fái fullar bætur, þar sem gerandinn sé ekki borgunarmaður fyrir þeim bótum sem hann var dæmdur til þess að greiða.

Tekið skal fram að hvorugt málanna hefur farið fyrir Hæstarétt og er því einungis um úrskurð héraðsdóms að ræða.