Féll þrisvar sinnum í yfirlið en fékk enga aðstoð

Lára Ósk Ásgrímsdóttir fór í sund í Grafarvogslaug á föstudaginn í síðustu viku. Það væri svo sem ekki í frásögur færandi ef ekki hefði liðið þrisvar sinnum yfir hana inni í búningsklefa án þess að nokkur kæmi henni til aðstoðar.

„Ég fór í sund og var þarna í svona klukkutíma eða eitthvað. Ég var í sturtunni og byrjaði að svima og vaknaði svo á gólfinu," segir Lára. Hún segist ekki hafa skilið hvað hún væri að gera á gólfinu. „Ég man að það voru þrjár konur sem horfðu á mig, sem eru bara í sínum sturtum," segir Lára. Konurnar hafi ekkert brugðist við. Lára telur svo að hún hafi vankast aftur. Hún hafi svo staðið aftur upp og sest á bekk. Þá hafi komið gömul kona og spurt sig hvort ekki væri allt í lagi. „Svo vaknaði ég bara aftur á bekknum og þá hafði liðið yfir mig aftur þar," segir Lára. Hún hafi síðan farið heim til sín og þaðan á spítala. Þar hafi hún verið lungann úr deginum til þess að láta kanna hvað hefði gerst. Í ljós hafi komið að það væri einhver æð í líkamanum sem hafi ekki starfað eðlilega.

Lára segir að mamma sín hafi hringt í Hafliða Halldórsson, forstöðumann laugarinnar, og gert athugasemdir við að ekki væri gæsla í búningsklefanum. Hafliði segir í samtali við Vísi að Grafarvogslaug sé alltaf með laugarvörð á vakt eins og gerð sé krafa um í reglugerðum. Þá sé starfsmaður sem sjái um þrif í búningsklefa. Jafnframt sé Íþrótta- og tómstundaráð með samning við Fræðslumiðstöð um starfsmann sem gæti búningsklefanna á þeim tíma sem skólasund fer fram. Hins vegar beri sundlauginni engin skylda til þess að vera með stöðuga gæslu í búningsklefa. „Það eina sem okkur ber skylda til gagnvart vinnu- og heilbrigðiseftirliti er að vera með laugarverði," segir Hafliði. Fólk sé því á eigin ábyrgð inni í búningsklefa. Hann segist skilja að fólk telji eðlilegt að það eigi að vera gæsla inni í klefa. Baðverðir hafi verið áberandi í laugunum áður fyrr. „En svoleiðis er það bara ekki lengur," segir Hafliði.

Aðspurður segir Hafliði að það komi sér mjög á óvart að enginn hafi aðstoðað Láru og að enginn hafi látið starfsfólk laugarinnar vita af þessu atviki.