Áhættuleikarinn endurheimtur til þess eins að verða myrtur

„Jú ég er búinn að sækja gínuna," sagði leikstjórinn Friðrik Þór Friðriksson þegar Vísir ræddi við hann í kvöld en japanskri gínu sem var í bifreið hans var stolið í gærmorgun. Hann hafði rétt brugðið sér frá bílnum þegar drukknir félagar sáu gínuna og kipptu henni með sér.

Gínan, sem hefur komið víða við, er áhættuleikari og leikur nú í þáttunum Tími nornarinnar, sem Friðrik Þór er að gera eftir Skáldsögu Árnar Þórarinssonar.

„Það urðu smá tafir en ég kærði þetta ekki," sagði Friðrik Þór en gínuránið varð til þess að fresta þurfti tökum á þættinum. Gínan átti að gossa fram af húsþaki og því bíður hennar varla betri örlög eftir að hafa verið frelsuð úr gleðiprísund sem félagarnir Kristófer og Róbert á Akureyri stóðu á bak við.

Þeir höfðu samband við Vísi í dag eftir að fréttir voru fluttar af gínuráninu. Þeir skiluðu þá gínunni til lögreglunni og biðluðu til eigandans að kæra sig ekki fyrir prakkarastrikið.

„Menn voru bara að fá sér," sagði Kristófer í samtali við Vísi þegar hann var spurður út í ástæðuna fyrir því að þeir stálu gínunni.

Friðrik Þór er að vonum sáttur við að endurheimta gínuna sem hann segir ganga undir ýmsum nöfnum, „Þá helst japönskum," segir hann.