Útskrifa lögfræðinga án grunnþekkingar

„Ég hef áhyggjur af því hvort menntun lögfræðinga sé í öllum tilvikum nógu góð," segir Brynjar Níelsson, hæstaréttarlögmaður og formaður Lögmannafélags Íslands.

„Útskrifaðir lögfræðingar sem við erum að fá í lögmannapróf til að öðlast lögmannsréttindi, eru að falla í stórum stíl, sem er ekki nógu gott," segir Brynjar sem telur nauðsynlegt að gerð verði úttekt á laganámi hér á landi. Athuga þurfi hvort námið fullnægi eðlilegum kröfum sem gera eigi til slíks náms.

„Þá þurfa þeir sem vinna mikil ábyrgðarstörf hjá dómstólum og í stjórnsýslunni ekki að taka lögmannspróf," bætir Brynjar við.

Í formannspistli í síðasta Lögmannablaði bendir Brynjar meðal annars á að sé menntun lögfræðinga ófullnægjandi og kunnáttan lítil muni þeir sem sinna lögfræðistörfum ekki njóta trausts og trúverðugleika. Það geti haft alvarlegar afleiðingar.

Fjórir íslenskir háskólar kenna nú grunnnám og meistaranám í lögfræði. Þeir eru Háskólinn á Akureyri, Háskólinn á Bifröst, Háskóli Íslands og Háskólinn í Reykjavík.

„Þessir skólar hafa haft nokkuð frítt spil," útskýrir Brynjar. „Þeir ráða hvaða fög þeir kenna, hver lágmarkseinkunnin er og svo framvegis. Það sem ég hef áhyggjur af er að við erum að fá hér hópa af lögfræðingum, sem hafa fengið litla eða enga kennslu í grunnfögum lögfræðinnar. Menn segja svo að markaðurinn vinsi bara úr, en hann mun aldrei stjórna þessu fullkomlega."

Í Fréttablaðinu í mars kom fram að stór hluti þeirra sem þreyttu próf til lögmannsréttinda á árunum 2005-2009 stóðst ekki prófið.

Brynjar segir að í sum störf sé lögfræðimenntun skilyrði. Gera þurfi ráð fyrir því að í lögfræðiprófinu felist að menn geti leyst úr úrlausnarefnum sem varði oft mikla hagsmuni einstaklinga og félaga.

Engin fullvissa sé fyrir því að einstaklingar uppfylli þessi skilyrði þegar nám og kröfur fari eftir geðþótta skólastjórnenda.

„Því segi ég að það þurfi að gera nokkuð samræmdar kröfur um grunnnám í lögfræði sem allir skólar verða að hlíta. Svigrúm skólanna mætti síðan vera meira í meistaranámi," segir Brynjar Níelsson.- jss