„Hverjum er sætt í þingflokknum?“

Lilja Mósesdóttir, þingmaður Vinstri grænna, segir engan mun á stefnu Sjálfstæðisflokksins og ríkisstjórnarinnar hvað niðurskurð hjá hinu opinbera varðar. „Spurning hverjum er sætt í þingflokknum. Þeim sem fylgja eftir vilja félaganna og ályktunum flokksins eða þeim sem afvegaleiðast innan múra valdsins," segir Lilja á Facebook-síðu sinni í kvöld. Þar vísar hún til ummæla Steingríms J. Sigfússonar í kvöldfréttum Ríkissjónvarpsins. Þar sagði Steingrímur að Lilju, Atla Gíslasyni og Ásmundi Daða Einarssyni væri tæplega sætt í þingflokknum. „Nei, tæplega eins og ekkert hafi í skorist því þetta er nokkuð erfið uppákoma."

Lilja, Atli og Ásmundur Daði sátu öll hjá við afgreiðslu fjárlagafrumvarpsins í dag sem var samþykkt með minnstum mögulegum meirihluta á Alþingi.

Þrátt fyrir ítrekaðar tilraunir hefur ekki náðst í þremenningana í kvöld. Lilja fjallar þó um málið á samskiptavefnum Facebook. Þar segir hún meðal annars: „Sjálfstæðisflokkurinn hefur lýst því yfir að hann sé ánægður með niðurskurðinn. Það er m.ö.o. enginn munur á stefnu Sjálfstæðisflokksins og stefnu núverandi stjórnarflokka sem báðir fara gegn stefnu sinni með fjárlagafrumvarpinu sem var samþykkt í dag."