Móri sakar Erp um að endurskrifa söguna

„Ég er búinn að rappa síðan Erpur var í bleyju,“ segir rapparinn Móri.

Erpur lýsti yfir í útvarpsþættinum Harmageddon á dögunum að hann hefði uppvötað Móra á sínum tíma. Sagðist hann hafa fundið Móra í ræsinu fyrir utan Nonnabita og vísar í að þeir hafi hist fyrst á skemmtistaðnum Thomsen, sem stóð við Hafnarstræti.

Móri telur Erp fara með fleypur og hringdi inn í þáttinn þegar hann frétti af ummælunum frá mági sínum. „Ég ákvað að skella mér í símann og Erpur var eins og kúkur. Ég sagði honum að hann væri að endurskrifa söguna og stakk upp á að við hittumst undir fjögur augu og ræddum þetta,“ segir Móri. „Hann ætlaði að hringja í mig eftir þáttinn en er ekki ennþá búinn að því.“

Erpur segir að Móri hafi verið algjörlega óþekktur þegar hann rappaði í laginu XII vandamál á fyrstu Rottweiler-plötunni. „Það sem hann er að væla yfir er það - sem allir vita; staðreynd - að það hafði enginn heyrt í Móra rappa þegar hann rappar á fyrstu Rottweiler-plötunni sem kom út árið 2001,“ segir Erpur. „Hann getur vælt endalaust og vaðið í kannabisskýi misskilnings, en ári seinna kom platan hans út.“

Móri hefur verið opinber stuðningsmaður þess að kannabisefni verði lögleidd á Íslandi og Erpur er ómyrkur í máli um hann: „Móri er gangandi sönnun þess að kannabisefni er ekki skaðlaus.“ - afb