Gerrard: Það er orðið erfiðara að vinna okkur

Steven Gerrard, fyrirliði Liverpool, er sannfærður um að liðið sé búið að snúa við blaðinu eftir slæmt gengi síðustu misserin. Liverpool náði þó aðeins markalausu jafntefli á móti Wolves í gær en fyrirliðinn reyndi að vera jákvæður.

„Þetta var pirrandi og erfiður leikur. Wolves varðist vel og völlurinn var það slæmur að hann kom í veg fyrir mikinn samleik," sagði Gerrard.

„Við vorum samt ánægðir með það hvernig að við vörðumst sem lið og við erum núna búnir að spila fimm leiki í röð án þess að tapa. Það er orðið erfiðara að vinna okkur því fyrr á tímabilinu hefðum við örugglega tapað svona leik 0-1. Við erum búnir að snúa við blaðinu," sagði Gerrard.

„Við munum halda áfram að berjast um fjórða sætið, við eigum nokkra heimaleiki á næstunni og ef við vinnum þá getum við komist þangað á ný," sagði Gerrard.

„Það eru margir í búningsherberginu sem eiga erfitt með að horfa á okkur í sjöunda og áttunda sæti í stigatöflunni en það læra allir mikið af því að fara í gegnum erfiða tíma. Við höfum horft á hvern annan og ætlum okkur að laga þetta. Það mikilvægasta í síðustu fjórum leikjum er að leikmenn hafa sýnt þrá og karakter," sagði Gerrard.