Hátt í 100 tónleikar á einu ári

„Þetta er búið að vera mjög skemmtilegt en sömuleiðis strembið ár hjá okkur,“ segir Árni Rúnar Hlöðversson, einn af meðlimum FM Belfast. Sveitin er á sínu síðasta tónleikaferðalagi á árinu en hún hefur komið víða við og hefur haldið hátt í 100 tónleika á árinu. Þegar Fréttablaðið náði tali af Árna var hann að koma sér fyrir á hótelherbergi í Hollandi ásamt hinum í sveitinni.

„Ég get ímyndað mér að þetta sé svipað og að vinna sem sjómaður, alltaf að túra,“ segir Árni hress en er ekki alveg með á hreinu hversu mörg lönd þau eru búin að sækja heim. „Það er góð spurning, við erum búin að spila á tónleikahátíðum og fara oft til Þýskalands, Frakklands og Hollands. Svo erum við líka búin að spila í Noregi, Danmörku, Belgíu, á Spáni og núna bætum við Grikklandi og Tyrklandi á listann,“ segir Árni en ferðalögin hafa ekki gengið áfallalaust fyrir sig.

„Við höfum fjórum sinnum týnt farangrinum. Endurheimtum hann reyndar alltaf en það er orðið erfitt að afhenda farangurinn á flugvöllum því við höfum brennt okkur á því. Um daginn þurftum við meira að segja að spila með græjum sem við keyptum samdægurs og einni tölvu sem ég var með í handfarangri því að farangurinn fór á vitlausan stað. Svo var Lóa bitin af könguló í sumar,“ rifjar Árni upp.

Sveitin kemur heim í næstu viku og hefst þá handa við að leggja drög að nýju plötunni sinni. „Við ætlum að vera í fríi og einbeita okkur að lagasmíðum. Það er sko kærkomið frí og ef við höldum tónleika yfir jólin verður það eitthvað lítið. Platan kemur út í byrjun árs og við stefnum á að fylgja henni eftir næsta vor,“ segir Árni.- áp