Mikið um gostúrista í dag

Björgunarsveitarmenn hafa þurft að beita valdi til að koma í veg fyrir að ferðamenn á eldgosasvæðinu við Fimmvörðuháls fari sér að voða. Fólk þrjóskast við að verða við tilmælum björgunarsveitarmanna.

Talið er að rúmlega 2 þúsund manns hafi lagt leið sína hingað austur í gær til að berja eldgosið augum. Björgunarsveitarmenn vakta gönguleiðina héðan frá Skógum að fimmvörðuhálsi en þeir þurftu ítrekað að beita valdi í gær til að forða fólki frá bráðri lífshættu.

„En við reyndum að leiðbeina fólki og ýta því í burtu frá mestu hættusvæðunum og flestir tóku því vel en einn og einn þrjóskaðist við en allt slapp sem betur fer," sagði Jón Hermannsson hjá svæðisstjórn björgunarsveita. Spurður hvort fólk hafi verið í lífshættu svarar hann:

„Það var að okkar mati, þá urðum við svona nota valdbeitingu til þess að ýta fólki frá en það slapp allt sem betur fer en við teljum að nokkrir einstaklingar hafi farið óþægilega óvarlega við hraunjaðarinn."

Björgunarsveitarmenn veittu um 50 ferðamönnum aðstoð í gær og þá var einum bjargað í dag en sá var staddur á fimmvörðuhálsi klæddur leðurjakka og strigaskóm - og reyndist hann vera með merki um ofkólnum.

Jón segir að ferðamenn við gosstöðvarnar séu þó flestir vel útbúnir.