Sigurjón fellur fyrir sænskunni

„Ég hef hægt og rólega byggt upp ást á Svíþjóð," segir háðfuglinn og handritshöfundurinn Sigurjón Kjartansson.

Sigurjón er sestur á skólabekk og hóf nýlega nám í sænsku hjá Mími-símenntun. Ást á sænskri menningu varð til þess að Sigurjón ákvað að stúdera tunguna, sem hann segist hafa fallið fyrir. Hann segir að Svíar séu fremstir þjóða á ýmsum sviðum.

„Ég er fallinn fyrir sænskunni. Í popptónlist eru þeir fremstir norrænna þjóða og í ýmsu öðru, eins og kvikmynda- og sjónvarpsþáttagerð," segir hann.

Alls kyns vesen hefur að sögn Sigurjóns orðið til þess að hann hefur ekki getað sinnt náminu sem skyldi undanfarið. Hann hefur þó reynt að halda dampi, meðal annars með því að horfa á sænskt sjónvarpsefni. „Ég hef reynt að senda kennaranum tölvupósta á sænsku og svo hef ég horft á sænsku Eurovision-forkeppnina, Melodifestivalen," segir Sigurjón. Keppnin er einn af stærstu sjónvarpsviðburðum ársins í Svíþjóð og Sigurjón sparar ekki stóru orðin þegar hann lýsir því sem fyrir augu ber: „Stórkostlegt! þeir kunna að halda Eurovision-forkeppnir. Það er miklu hærri standard á þessu heldur en hér," segir hann og bætir við að Svíinn sé bestur í flestu.

Sigurjón hefur mikið komið að handritaskrifum fyrir sjónvarp undanfarið. Spurður hvort sú vinna sé ástæðan fyrir náminu segist hann ekki útiloka neitt. „Ég hef pínulítil sambönd þar, en ég segi ekki að ég sé endilega að gera þetta af faglegum ástæðum." - afb