Börnin vilja fleiri hoppukastala

Frambjóðendur stjórnmálaflokkanna fimm sem keppa í borgar­stjórnarslagnum í sveitarstjórnarkosningum í enda þessa mánaðar komu í heimsókn í leikskólann Nóaborg í gær og svöruðu fyrirspurnum barnanna.

Börnin hvöttu frambjóðendur til að fá ökumenn til að draga úr hraða bíla á götum borgarinnar, breyta leiðum strætisvagna svo þeir stöðvi nær leikskólum og Fjölskyldu- og húsdýragarðinum svo þau þurfi ekki að ganga yfir Suðurlandsbraut og bæta úr skorti á hoppuköstulum í borginni.

Nóaborg er eini leikskólinn sem frambjóðendur heimsækja en þeir komu þangað að frumkvæði skólans.

Nóaborg beinir sjónum að lýðræði í ákvarðanatöku og hafa nemendur til dæmis kosið um hvað eigi að vera í hádegismat og hvert skuli fara í vettvangsferðir. - jab