Yoko Ono vill að Oasis komi saman aftur

Yoko Ono, ekkja Bítilsins Johns Lennon, vonar að hljómsveitin Oasis muni koma aftur saman. Sveitin hætti fyrir nokkru eftir hávaðarifrildi bræðranna Liams og Noels Gallagher. Síðan þá hafa þeir ekki talast við.

„Ég elska Oasis. Við þurfum á góðu afli eins og þeim að halda. Þessi góðmennska skín í gegn í lögunum þeirra. Vonandi eiga þeir eftir að gera fleiri plötur," sagði hún. Oasis hefur oft verið líkt við Bítlana og sjálfir hafa Gallagher-bræðurnir oft lýst yfir aðdáun sinni á hljómsveitinni.

Yoko hefur einnig tjáð sig um mögulegt samstarf við hljómsveitina The Flam­ing Lips. Sveitin gerði nýja útgáfu af lagi hennar Cambridge 1969 á plötunni Yes, I"m A Witch sem kom út 2007. „Ég er mikill aðdáandi þeirra. Vonandi getum við starfað saman í framtíðinni," sagði hún.