N1 situr uppi með tíu þúsund eintök

„Þetta var góður skóli. Við munum auðvitað læra af þessu og horfa í aðferðafræðina. Við ætlum að endurtaka leikinn, vera þá með fleiri titla," segir Hermann Guðmundsson, forstjóri olíufélagsins N1.

Félagið hugðist hasla sér völl á hinum sívinsæla jólabókamarkaði og keypti dreifingarréttinn að tveimur ævisögum fyrir jólin: Storminn eftir Björgvin G. Sigurðsson og Jónínu Ben. eftir Sölva Tryggvason. Menn voru stórhuga og létu prenta sautján þúsund eintök, tíu þúsund af Jónínu og sjö þúsund af Björgvini. Í gær rann síðan stóra stundin upp þegar listi yfir mest seldu bækur ársins var birtur og þar er Björgvin hvergi sjáan­legur á neinum listum, Jónína er hins vegar fjórða mest selda ævisagan og situr í 19. sæti á heildarlistanum yfir árið. Hermanni taldist svo til að Jónína hefði selst í fimm þúsund eintökum en Björgvin í 2.400. N1 situr því uppi með tæp tíu þúsund eintökum af þessum tveimur bókum.