Þungarokk fyrir dómnefnd

Hljómsveitakeppnin Wacken Metal Battle verður haldin á Sódómu Reykjavík á laugardaginn. Sjö hljómsveitir berjast um að komast út til að spila á hátíðinni Wacken Open Air í Þýskalandi og taka þátt í lokakeppni Wacken Metal Battle þar. Til mikils er að vinna, því sigursveitin fær plötusamning, heilan haug af hljóðfærum og græjum og verður bókuð til að koma fram ári síðar á hátíðinni sem eitt af númerum hennar.

Tíu manna dómnefnd mun velja sigursveitina, en sex erlendir aðilar – blaðamenn, umboðsmenn og tónleikahaldarar – koma til landsins sérstaklega af þessu tilefni.

Sveitirnar sjö sem munu bítast um hnossið í ár eru með því besta sem landið hefur upp á að bjóða í þungarokkinu. Þetta eru black/death metalbandið Atrum frá Hafnarfirði. Carpe Noctem spilar svartmálm og syngur á íslensku, texta sem rífa í sig kristindóminn ásamt því að vitna í norræna goðafræði, heimsendaspádóma og íslenskan svartagaldur. Gone Postal spilar dauðarokk/grindcore og gerði plötuna In the Depths of Despair 2008.

Gruesome Glory kemur frá Akureyri og spilar teknískt þungarokk. Severed Crotch er elst keppnissveitanna, hefur verið að síðan 2004, og spilar teknískt þungarokk. Universal Tragedy var stofnuð 2007 og spilar dauðarokk og Wistaria spilar melódískt dauðarokk/metalcore og landaði öðru sætinu í Global Battle of the Bands á dögunum.

Tvær gestasveitir koma fram í þessari þungarokksveislu, Beneath sem fór með sigur af hólmi í íslensku Wacken-keppninni í fyrra, og Momentum, sem er að koma fram í fyrsta sinn á þessu ári. Húsið opnar kl. 20 og fer fyrsta sveit á svið kl. 20.45. Miðaverð er 1.300 kr. Æskilegur klæðnaður er svartur.- drg