Hera Björk, Stefán Hilmars og Egill Ólafs taka yfir Salinn

Kópavogsdagar hefjast á morgun og er margt á dagskrá en dagarnir eru að þessu sinni helgaðir minningu Sigfúsar Halldórssonar tónskálds.

Ásamt sýningu í Tónlistar­safni Íslands á ýmsu efni sem tengist ferli hans hefur Björn Thoroddsen sett saman lítið kombó með þeim Jóhanni Hjörleifssyni, Jóni Rafnssyni og Pálma Sigurhjartarsyni. Munu þeir ásamt söngvurunum Heru Björk Þórhallsdóttur, Stefáni Hilmarssyni og Agli Ólafssyni flytja nær tuttugu lög eftir Sigfús á sex tónleikum í dag og á morgun, og á föstudag og laugardag um næstu helgi.

Björn segir það hafa komið sér á óvart þegar hann stóð fyrir námskeiði fyrir ungt tónlistarfólk í Molanum að krakkar um tvítugt þekktu allir lög Sigfúsar. „Þau standast tímans tönn," segir hann. Tónbygging þeirra sé af evrópskum meiði, frekar en bandarískum þótt Björn og hans félagar leggi á þau djassslikju. „þau eru raunar frekar með ítölskum brag," segir Björn.

Miðasala er á tónleikaröðina í Salnum og hér á midi.is og er þegar vel selt á tónleikaröðina enda Sigfús uppáhald margra og því heiðursess hans á Kópavogsdögum auðskilinn og sjálfsagður.

Sigfús Halldórsson fæddist 7. september 1920 og ólst upp í Reykjavík. Sigfús varð snemma áberandi í bæjarlífinu. Hann vann sem sendill frá unga aldri í Útvegsbankanum sem þá var í miðju samfélagsins í þorpinu Reykjavík og vann þar allt til 1944. Einkar ljúf lund hans og elskulegt fas aflaði honum snemma vinsælda og svo sú náttúrugáfa sem fólst í söngrödd hans og hljóðfæraleik. Hann varð á unga aldri kunnur sem skemmtikraftur í samkvæmislífi og tók að koma fram sem slíkur fyrir tvítugsaldurinn.

Hann lék í óperettum og revíum í upphafi stríðsins en hugur hans hneigðist ekki síður að myndlist: Hann stundaði nám í málaraskóla Marteins Guðmundssonar og Björns Björnssonar, en var í hópi þeirra sem leituðu erlendis til náms og lauk brottfararprófi með fyrstu verðlaun í leiktjaldahönnun og málaralist frá hinum þekkta skóla Slade Fine Art School 1945. Hann sótti sér framhaldsmenntun við Stokkhólm­sóperuna 1947 og 1948 og starfaði á málarasal Þjóðleikhússins 1950 til 1952, hann vann hjá J. Þorláksson & Norðmann 1954 til 1955, var starfsmaður á bókasafni Bandaríkjahers 1955 til 1956, á skattstofu Reykjavíkur 1957 til 1968. Fastur teiknikennari við Langholtsskóla 1968 til 1981, auk þess sem hann hélt fjölda námskeiða í teiknun á sama tíma. Þá ferðaðist hann með leikflokkum um landið frá 1939 og allt til 1955.

Fyrstu hljóðrit Sigfúsar sem urðu kunn hér á landi voru hans eigin sönglög. Hann mun hafa samið um 100 tónsmíðar af ýmsu tagi og er nú unnið að því að koma reiðu á safn hans til útgáfu, en margir listamenn hafa sóst eftir að syngja hans þekktustu lög sem eru alþýðueign.

Sigfús byrjaði ungur að mála og hefur um dagana haldið fjölda málverkasýninga, hérlendis og erlendis bæði einn og með öðrum. Hann var kjörinn heiðursborgari Kópavogs 1994 og var það í þriðja sinn sem Kópavogsbúar völdu sér heiðursborgara en þau Steinunn kona hans settust að í bænum 1963.

pbb@frettabladid.is