Selja útlendingum ýsu sem þorsk

Lögregla hefur til rannsóknar annað mál þar sem fiskframleiðandi merkti ýsu sem þorsk til útflutnings. Lögfræðingur Fiskistofu segir svindl sem þetta geta haft áhrif á verðmyndun fiskitegunda innanlands og utan og spillt orðspori íslenskra fiskútflytjenda.

Í fréttum okkar í gær sögðum við frá því að Héraðsdómur Reykjaness hefði dæmt framkvæmdastjóra og matsmann fiskvinnslunnar Nordic Gourmet í átta mánaða skilorðsbundið fangelsi fyrir að flytja út fisk undir röngum tegundarnöfnum. Þannig voru ýsa og langa flutt út sem þorskur og keila sem steinbítur. Með þessu hagnaðist fyrirtækið verulega á því að selja ódýrari tegundir sem dýrari.

Gísli Rúnar Gíslason, lögfræðingur Fiskistofu, segir annað mál af svipuðum toga vera í rannsókn hjá lögreglu. „Þar var um það að ræða að aðili var að vinna ýsu og merkti þessar afurðir hinsvegar sem þorsk."

„Það virðist vera þannig að þetta sé afli sem er löglega keyptur og vigtaður en aftur á móti við vinnslu er verið að roðfletta og pakka og selja ýsu sem þorsk," segir Gísli Rúnar.

Hann segir háttarlag sem þetta geta haft alvarlegar afleiðingar fyrir trúverðugleika fiskútflytjenda hjá kaupendum í útlöndum. „Það er náttúrulega alvarlegt að aðili skuli gera svona. Menn eiga að geta treyst því að þeir séu að fá þær fiskafurðir sem þeir eru að kaupa."

Þá getur svindl sem þetta haft áhrif á fiskverð á mörkuðum hér innanlands. „Hér heima getur það náttúrulega gerst að verð á ódýrari tegundum hækki vegna þess að aðili sem nær að selja hana sem dýrari tegund úti getur hugsanlega keypt hana hærri verði enn aðrir sem hafa unnið hana heiðarlega og selja hana sem slíka," segir Gísli Rúnar.

Og þá gæti þetta leitt til lækkunar á verði dýrari fisktegunda í útlöndum ef svindlið væri í stórum stíl. En Gísli Rúnar telur að sem betur fer sé svindl sem þetta ekki algengt.