Breytt viðbúnaðarstig vegna eldgossins á Fimmvörðuhálsi

Ákveðið hefur verið að færa viðbúnað vegna eldgossins á Fimmvörðuhálsi niður um eitt háskastig. Viðbúnaður hefur verið á hæsta háskastigi, það er á neyðarstigi, en mun frá og með deginum í dag færast á svokallað hættustig. Þær takmarkanir á umferð sem áður hafa verið kynntar eru enn í fullu gildi. Þetta kemur fram í tilkynningu frá Almannavörnum.

Í reglugerð um háskastigin er hættustig skilgreint á þessa leið: „ Ef heilsu og öryggi manna, umhverfis eða byggðar er ógnað af náttúru- eða mannavöldum þó ekki svo alvarlegar að um neyðarástand sé að ræða."

Í tilkynningunni segir að þetta breyti því ekki að á meðan gos sé í gangi eða líkur á að það byrji aftur sé þörf á fullri gát við eldstöðina á Fimmvörðuhálsi.

Þær takmarkanir á umferð sem áður hafa verið kynntar eru í fullu gildi. Öll umferð innan eins kílómetra radíus við gosstöðina er bönnuð og einnig umferð um Hrunagil, Hvannárgil og Eyjafjallajökul. Umhverfis gosstöðina er skilgreint hættusvæði fimm kílómetrar.