Benzema: Lyon nær oft að stíga upp í stóru leikjunum

Karim Benzema vonast til þess að vera klár í slaginn með Real Madrid gegn Lyon í 16-liða úrslitum Meistaradeildarinnar annað kvöld en framherjinn yfirgaf sem kunnugt er herbúðir franska félagsins til þess að fara til þess spænska síðasta sumar.

Benzema veit því líklega manna best hversu megnugt Lyon liðið er.

„Ég var að djóka við fyrrum liðsfélaga mína í síma þegar drátturinn fór fram um að ég vildi fá að mæta Lyon. Þegar það gerðist svo þá var tilfinningin óneitanlega skrýtin.

Það verður skrýtið að spila gegn Lyon á Gerland-vellinum þar sem ég á margar minningar og hef skorað mikið af mörkum. Þetta verður þó mjög skemmtilegt því öll fjölskylda mín verður á leiknum.

Við verðum samt að mæta tilbúnir í leikinn því Lyon á það til að stíga upp í stóru leikjunum og spila frábæra leiki," segir Benzema í viðtali á heimasíðu UEFA.