Áhrifarík meðferð við ristilkrabba í augsýn

„Niðurstöður úr nýrri rannsókn í Bretlandi benda til þess að mögulegt sé að lækka nýgengi krabbameins í ristli og endaþarmi um helming. Það er ótrúlegt en satt," segir Tryggvi Björn Stefánsson, sérfræðingur í almennum skurðlækningum.

Krabbamein í ristli og endaþarmi er þriðja algengasta krabbamein hér á landi.

„Á Landspítalanum gerum við um og yfir 100 aðgerðir á ári. Ef við lækkum nýgengið um helming yrði um hreina byltingu að ræða, því helmingur þeirra sem greinist á hverju ári er með ólæknanlegan sjúkdóm í dag og deyr innan fimm ára."

Árið 2005 var stofnaður fjölþjóðlegur félagsskapur sem kallar sig NordICC um að rannsaka gildi ristilspeglunarskimunar til þess að finna krabbamein í ristli og endaþarmi. Takmarkið er að lækka nýgengi og dánartíðni vegna þessa sjúkdóms. Rannsóknin er hafin í Póllandi og Hollandi. Henni verður hleypt af stokkunum í Noregi á næstunni. Niðurstöður frá fyrrnefndu löndunum lofa afar góðu. Af þeim tvö þúsund sem rannsakaðir hafa verið hefðu hundrað fengið krabbamein án skimunar, ef miðað er við þekktar tölulegar staðreyndir um sjúkdóminn.

Tryggvi Björn hvetur til þess að Íslendingar taki þátt í rannsókn NordICC. „Mikilvægið við þessa rannsókn er að sýna fram á að það sé raunverulega hægt að lækka tíðni þessa illvíga krabbameins, eins og margt bendir til. Það er nauðsynlegt að sýnt verði fram á hvort skimunin sé nægilega örugg til að ráðleggja hana sem aðferð til lækninga." Vitnar Tryggvi Björn þar til annarra rannsókna sem nýttar eru í forvarnaskyni, eins og leit að brjóstakrabbameini hjá konum, þar sem stór hluti mannfjöldans fer til læknis til staðbundinnar krabbameinsleitar.

Gert er ráð fyrir að eitt til tvö þúsund Íslendingar taki þátt í rannsókninni en NordICC stefnir að því að um 20 þúsund manns verði rannsakaðir í allt. Framlag Íslands myndi kosta um 60 milljónir króna. Tryggvi Björn hefur sjálfur safnað tíu milljónum í gegnum ýmsa sjúkra- og lífeyrissjóði.

Árlegur kostnaður heilbrigðis­kerfisins af meðferð vegna ristilkrabbameins er yfir milljarður króna. - shá