Gríðarleg fjölgun kynferðisafbrotamála

Það hefur orðið gríðarleg fjölgun kynferðisafbrotamála á síðustu 10 - 15 árum, segir Hulda Elsa Björgvinsdóttir, settur saksóknari hjá Ríkissaksóknara.

Hulda Elsa var á meðal ræðumanna á ráðstefnu um unga kynferðisafbrotamenn sem haldin var í Háskólanum í Reykjavík á föstudag. Hún sagði í ræðu sinni að aðilar úr réttarvörslukerfinu, bæði ákæruvaldið og dómstólarnir, hefðu haft töluverðar áhyggjur af þessari fjölgun og hefðu með ýmsu móti reynt að koma þeim áhyggjum á framfæri.

Hulda Elsa sagðist telja að þessi fjölgun væri ekki einungis til marks um það að fleiri mál væru að koma upp á yfirborðið heldur væri afbrotum raunverulega að fjölga. Þá taldi hún að brotin væru mun alvarlegri en áður. Máli sínu til stuðnings benti Hulda Elsa á að brot sem tengjast Internetinu væru töluvert áberandi núna. Þessi brot hefðu ekki verið til áður.



Þurfum að spyrja okkur hvernig hægt er að fækka afbrotum

Hulda Elsa taldi að Íslendingar þyrftu að fara í smá naflaskoðun. Við þyrftum meðal annars að spyrja okkur að því hvort umburðarlyndi okkar fyrir klámi væri að koma aftan að okkur, hvort börn væru að ganga of mikið sjálfala og hvort við hefðum nægjanlega mikið eftirlit með netnotkun barna okkar.

Hulda Elsa segist telja að unnt sé að fækka þeim tegundum brota þar sem ungir gerendur, 15-17 ára, brjóta kynferðislega gegn stúlkum sem ekki hafa náð kynferðislegum lögaldri, það er að segja stúlkum yngri en 15 ára. „Í þeim tilvikum hafa piltarnir yfirhöndina í skjóli aldurs- og þroskamunar, og iðulega bera þeir fyrir sig að þeim hafi ekki verið kunnugt um aldur stúlknanna, en hafi ekki haft fyrir því að kanna það fyrirfram. Og virðingaleysi einkennir oft athafnir þeirra. Þá virðist sem stúlkurnar skorti oft á tíðum sjálfstraust til að setja þeim mörk," segir Hulda Elsa. Hún segir að til að unnt sé að fækka þessum tegundum kynferðisbrota þurfi hins vegar vakningu í samfélaginu og foreldrar þurfi að taka höndum saman.

Hulda Elsa sagði mikilvægt að efla forvarnarstarf gagnvart kynferðisofbeldi og hrósaði meðal annars samtökunum Blátt áfram fyrir þeirra þátt í forvarnarstarfinu.