Hraunið rennur í átt að Krossá

Eldgosið heldur áfram af sama krafti og hraunið rennur niður Hrunagil og Hvannárgil í átt að Krossá. Fisflugvél nauðlenti á Fimmvörðuhálsi í dag.

Samkvæmt upplýsingum frá Veðurstofunni hafa fáir skjálftar verið á svæðinu í dag og eldgosið verið nokkuð stöðugt.

Um hádegisbil í gær fór hraun að renna niður Hvannárgil eins og sést á þessum myndum sem Guðmundur Óli Gunnarsson tók af hraunfossinum mikilfenglega í gær. Þar má sjá hraunið renna í allri sinni dýrð fram af brúninni en hraunið rennur einnig niður Hrunagil.

Bólstrarnir á svæðinu hafa minnkað mikið síðan í gær sem bendir til þess að hraunið sé nú búið að bræða nær allan ís, en það rennur nú hægt í átt að Krossá.

Talið er að hrauntungan renni um einn meter á klukkustund og er nú komið rétt tæpa 2 kílómetra frá gosstaðnum. Víðir Reynisson frá Almannavörnum segir rennslið hafa verið stöðugt í dag og litlar breytingar hafi orðið síðan í gær.

Almannavarnir halda þó enn öryggissvæði í fimm kílómetra radíus, auk þess sem Þórsmörk og Eyjafjallajökull eru enn lokuð og verða eitthvað áfram.

Um klukkan fjögur í dag nauðlenti fisflugvél á Fimmvörðuhálsi en flugmaðurinn virðist skyndilega hafa þurft að lenda vélinni nærri gosinu.

Samkvæmt lögreglunni á Hvolsvelli var einn maður um borð og er hann ómeiddur. Rannsóknarnefnd flugslysa og lögregla fóru á vettvang til þess að kanna aðdraganda slyssins en mikil flugumferð hefur verið á svæðinu undanfarna daga.