Fáið að sjá hinn sanna Messi í seinni leiknum

Pep Guardiola, þjálfari Barcelona, segir að slök frammistaða Lionel Messi í fyrri undanúrslitaleiknum gegn Inter hafi aðeins verið lítið frávik. Messi var lítið áberandi í leiknum sem Inter vann 3-1.

„Við bjóðum þér til Barcelona og þá sérðu hinn sanna Messi. Áhorfendur munu veita okkur suðning og við getum alveg farið áfram," sagði Guardiola við blaðamann.

Börsungar voru ekki sáttir við dómgæsluna í leiknum og lentu Xavi, miðjumaður spænska liðsins, og Jose Mourinho, þjálfari Inter, í orðaskiptum í göngunum eftir leik.

„Hvað fannst þér um dómgæsluna?" hrópaði Xavi að Mourinho. Þá svaraði sá portúgalski: „Af hverju ertu að spyrja mig? Hvað um leikinn ykkar gegn Chelsea á síðasta tímabili?!"