Meiðyrðamál vegna forstjóra SS fellt niður

Ríkissaksóknari hefur fellt niður ákærur á hendur Oddi Eysteini Friðrikssyni, sem var ákærður fyrir meiðyrði í garð Steinþórs Skúlasonar, forstjóra Sláturfélags Suðurlands.

Mál Odds Eysteins var dómtekið á árinu en athygli vakti að ríkissaksóknari ákærði í málinu en meiðyrðamál eru yfirleitt höfðuð af þeim sem telur sig hafa orðið fyrir skaða. Oddur var sakaður um að hafa haldið úti heimasíðunni slaturfelagid.blogspot.com þar sem ummælin voru látin falla.

Oddur lýsti yfir sakleysi sínu þegar málið var tekið fyrir í byrjun febrúar. Það var svo 11. mars sem Oddur fékk bréf sent frá ríkissaksóknara þar sem honum var tilkynnt að málið væri látið niður falla þar sem talið var að ekki væri líklegt að hann yrði sakfelldur.