Real Madrid búið að ganga frá kaupunum á Di Maria

Angel Di Maria hefur formlega gengið í raðir Real Madrid á Spáni eftir að hann stóðst læknisskoðun hjá félaginu. Það var staðfest í dag.

Real Madrid og Benfica komust að samkomulagi um kaupin í lok síðasta mánaðar og er kaupverðið sagt nema 25 milljónum evra.

Angel Di Maria lék með landsliði Argentínu á HM í Suður-Afríku en liðið féll úr leik í fjórðungsúrslitum keppnininar.

Læknalið Real Madrid var afar ánægt með niðurstöður læknisskoðunarinnar en Di Maria, sem er 22 ára gamall, skrifaði undir sex ára samning við félagið.

Hann gekk í raðir Benfica árið 2007 og varð á sínum tíma heimsmeistari U-20 liða með Argentínu.