„Það er hræðilegt að einhver skuli gera svona," segir Elín G. Folha, starfsmaður í Kattholti. Maður á fertugsaldri fann níu lifandi ketti í stórum kartöflupoka þegar hann var á gangi með hundinn sinn í Heiðmörk í fyrradag. Hundurinn heyrði kettina mjálma og hljóp af stað. Þegar manninn bar að sá hann hvar pokinn lá úti í hrauni og búið að binda fyrir. Augljóst var að lóga átti köttunum með grimmilegri aðferð.

Kettirnir eru þriggja mánaða gamlir og upp í eins árs. Maðurinn brást skjótt við, sótti búr í bílinn sinn og tók kettina með sér heim. Í gær hafði hann svo samband við Kattholt og kom fimm þeirra í fóstur.

Maðurinn ætlar að reyna að finna hinum köttunum fjórum heimili, annars fara þeir líka í Kattholt.

Elín hjá Kattholti segir að kettirnir séu ekki illa hirtir en þeir séu mjög hvekktir. „Dýrin eru rosalega inni í sér. Ef ég reyni að klappa þeim fara þau undan í flæmingi. Það er eins og þau hafi verið barin eða eitthvað. Ein af læðunum er þó farin að koma til. En fressarnir og hinar læðurnar tvær eru ekki nógu góðar. Ég veit ekki hvað hefur gengið á hjá þeim áður. Það er óhugnanlegt að vita til þess að fólk vinni svona myrkraverk."

Elín segir að svona mál komi upp nokkrum sinnum á ári. Stundum eru kettirnir sem skildir eru eftir fyrir utan athvarfið nær dauða en lífi. Stundum eru þeir dauðir.

„Það er skelfilegt að henda svona dýrum út," segir Elín. Hún segir að starfsmenn Kattholts tilkynni svona mál jafnóðum til Dýraverndarsambandsins en það beri því miður ekki árangur.

„Við reynum það sem við getum gert en oftast er bara ekkert hægt að gera. Það veit enginn hver eigandi dýranna er," segir Elín í Kattholti. kristjan@frettabladid.is