Dagar sjálfstæðrar peningamálastefnu liðnir

Ég tel að dagar sjálfstæðrar peningamálastefnu séu liðnir, sagði Illugi Gunnarsson, þingmaður Sjálfstæðisflokksins, í umræðum um peningamálastefnu Seðlabankans á Alþingi í dag. Illugi segist telja að Seðlabanki Ísands geti ekki sett vaxtastig sitt eins og honum henti þegar búið sé að opna fyrir frjálst flæði fjármagns.

„Sú leið sem farin var þar sem vextir voru miklu hærri hér en á nágrannalöndunum bar feigð í sér," sagði Illugi. Hingað hafi borist mikið fé með svokölluðum jöklabréfum þegar vextirnir voru sem hæstir. Hið sama gerist ef vextirnir séu allt of lágir. Þá streymi fjármagn úr landi. Illugi sagði að það þyrfti að tengja saman fjármál ríkisins, fjármál sveitarfélaganna og Seðlabankann.

Þá sagði Illugi að á meðan að hér eru gjaldeyrishöft hljóti að þurfa að keyra niður vexti miklu hraðar en raun ber vitni. Það sé ekki hægt að aflétta gjaldeyrishöftum nema að framleiðslan sé komin á skrið og fyrirsjáanlegt að hér myndist öflugt viðskiptalíf. Illugi sagði að kostnaðurinn af mögulegu verðbólguskoti sem myndi hljótast vegna stýrivaxtalækkunar væri miklu minni að hans mati en kostnaðurinn við að hafa vaxtastigið svona hátt.

Það var Birkir Jón Jónsson, .þingmaður Framsóknarflokksins, sem var málshefjandi í umræðunum. Hann kallaði eftir lægri stýrivöxtum og að skipuð yrði þverpólitísk nefnd á Alþingi til þess að fara yfir peningastefnuna.

Gylfi Magnússon, efnahags- og viðskiptaráðherra, sagði að Seðlabanki Íslands væri sjálfstætt stjórnvald og Seðlabankinn væri sjálfstæður. Það þýddi að efnahags- og viðskiptaráðherra ætti helst ekki að vera að senda henni skilaboð um hvaða niðurstöður hann vildi fá frá henni. Hann sagði hins vegar að æskilegt væri að um Seðlabankann ríkti þverpólitísk sátt og hann skilinn frá hinu flokkspólitíska umhverfi. Hann tæki því vel í hugmyndir um myndun þverpólitískrar nefndar.