Landsliðstreyjurnar uppseldar

Landsliðstreyjur Íslands í handbolta seldust upp í gær eftir sigurinn frækna gegn Norðmönnum.

Magnús Vignir Pétursson, eigandi Jóa útherja, segir það leiðinlegt að ekki skuli lengur vera til treyjur fyrir fjölmarga aðdáendur liðsins. „Síminn hringir stanslaust og það eru allir að spyrja um þetta sem eru að fara út á leikina. Það eru tvær til þrjár flugvélar fullar af fólki og það þýðir fimm hundruð manns,“ segir hann.

Engir búningar eru væntanlegir fyrr en eftir viku en þá verður mótið löngu búið. „Þetta gengur ekki og ég er voða sár yfir þessu. Ekki eingöngu vegna viðskiptanna heldur vegna HSÍ. Það á að láta þá njóta góðs af því að framleiða eins mikið og hægt er til að styrkja þá.“ Að sögn Magnúsar hafa sumir viðskiptavinir brugðið á það ráð að kaupa landsliðstreyjur í fótbolta til að klæðast á pöllunum í Austurríki í stað handboltatreyjanna.

Starfsmaður fyrirtækisins Sportlands, sem pantar treyjurnar frá Þýskalandi, sagði Fréttablaðinu að ákveðið hefði verið að hafa hægt um sig í innkaupum á treyjum vegna þess að nýr landsliðsbúningur komi í vor og þeir hafi ekki viljað sitja uppi með stóran lager af úreltum treyjum. Eftirspurnin haldist í hendur við gengi liðsins og því miður hafi ekki verið til nóg af treyjum fyrir alla í þetta sinn.

Að sögn Hermanns Þórs Þráinssonar, markaðs- og fjölmiðlafulltrúi HSÍ, stendur til koma upp netverslun á heimasíðu HSÍ og þá kemur þetta vandamál vonandi ekki upp aftur. - fb