"Vötn öll skulu renna sem að fornu hafa runnið"

Ákvörðun um að færa ósa Markarfljóts kann að stangast við vatnalög, frá árinu 1923. "Vötn öll skulu renna sem að fornu hafa runnið," er lykilákvæði vatnalaga en í 7. grein er lagt bann við því að breyta vatnsbotni, straumstefnu eða vatnsmagni, hvort sem það verður að fullu og öllu eða um ákveðinn tíma, nema fyrir liggi sérstakt leyfi iðnaðarráðherra eða lagaheimild Alþingis.

Kristján Skarphéðinsson, ráðuneytisstjóri iðnaðarráðuneytis, segir ekkert erindi um færslu ósa Markarfljóts hafa borist ráðuneytinu. Hann bendir jafnframt á að 75. grein vatnalaga hljóti að koma til skoðunar í þessu tilviki en hún heimilar ríkinu, héruðum, vatnafélögum og einstökum mönnum að breyta vatnsfarvegum "í því skyni að verja land eða landsnytjar við spjöllum af landbroti eða árennsli vatns".

Það er síðan túlkunaratriði hvort "landsnytjar" megi heimfæra upp á Landeyjahöfn í þessu tilviki. Lagagreinin kveður jafnframt á um það að aðeins megi framkvæma verkið ef leyfi ráðherra liggur fyrir.