Þorgerður Katrín Gunnarsdóttir, fyrrverandi varaformaður Sjálfstæðisflokksins, segir að sjálfstæðismenn þurfi að horfast í augu við að aðildarferlið sé hafið og því sé æskilegra að menn sameinist um að berjast fyrir hagsmunum Íslands í aðildarviðræðum við sambandið. Fyrrverandi formaður flokksins segist ekki sjá fyrir sér stofnun nýs flokks óánægðra sjálfstæðismanna.

Nokkrir áhrifamenn í Sjálfstæðisflokknum sem rennt hafa hýru auga til Evrópusambandsins eru óánægðir með stjórnmálaályktun landsfundar flokksins, en á fundinum var samþykkt stjórnmálaályktun sem fól í sér að flokkurinn krefðist þess að umsókn um aðild þjóðarinnar að Evrópusambandinu yrði dregin til baka. Ekki var fallist á málamiðlunartillögu flokksforystunnar sem gekk ekki eins langt og sú tillaga sem að lokum var samþykkt.

Sveinn Andri Sveinsson, hæstaréttarlögmaður, er einn þeirra, en hann segir að ályktun fundarins hafi verið mikil vonbrigði og að flokkurinn sé farinn að minna á sértrúarsöfnuð. Hann segist hins vegar ekki hafa tekið ákvörðun um að hætta í flokknum.

Guðbjörn Guðbjörnsson sem gegnt hefur trúnaðarstörfum fyrir flokkinn í Suðvesturkjördæmi sagði sig úr flokknum á laugardag og sagði að frjálslyndum sjálfstæðismönnum hefði verið úthýst úr flokknum. Flokkurinn stæði nú fyrst og fremst vörð um sérhagsmuni LÍÚ og bænda.

Benedikt Jóhannesson sendi samtökunum Sjálfstæðum Evrópumönnum, sem hann er í forsvari fyrir, tölvupóst í gær og nefndi að margir hefðu viljað stofna nýjan hægri flokk með Evrópusambandsumsókn sem grunnstef. Benedikt hefur þó ekki tekið afstöðu til þess hvort hann yrði hluti af slíkum flokki.

Þorsteinn Pálsson, fyrrverandi formaður Sjálfstæðisflokksins, sagði við fréttastofu nú í morgun að frá sínum bæjardyrum séð hefði flokkurinn tekið mjög óskynsamlega ákvörðun með stjórnmálaályktuninni. Niðurstaða landsfundar væri bæði vond fyrir flokkinn og Evrópumálstaðinn. Hann sagðist hins vegar ekki vera á leið úr flokknum, það þyrfti meira til, en niðurstaðan væri hættuleg staða fyrir Sjálfstæðisflokkinn. Þorsteinn segist ekki sjá fyrir sér stofnun nýs flokks óánægðra sjálfstæðismanna.

Þorgerður Katrín Gunnarsdóttir, fyrrverandi varaformaður Sjálfstæðisflokksins, er ein þeirra sem hefur verið opin gagnvart aðild að Evrópusambandinu. Hún sagði á viðskiptaþingi Viðskiptaráðs Íslands hinn 12. mars á síðasta ári að tvíþætt vandamál myndi leysast með aðild að ESB. Peningamálastefnan og gjaldmiðillinn og ekki síður orðspor þjóðarinnar og viðskiptavildin. "Getum við verið ein eða er betra fyrir okkur að vera í samstarfi við aðrar þjóðir?" spurði Þorgerður þá sem varaformaður Sjálfstæðisflokksins.

Þorgerður Katrín, sem er í tímabundnu leyfi frá þingstörfum, sagði í samtali við fréttastofu nú í morgun að sín afstaða hefði ekkert breyst. Hún sagði að sjálfstæðismenn þyrftu að horfast í augu við að aðildarferlið væri hafið og því væri æskilegra að menn sameinuðust um að berjast fyrir hagsmunum Íslands í aðildarviðræðum við sambandið.