Sölvi Sveinsson ráðinn skólastjóri Landakotsskóla

Stjórn Landakotsskóla hefur samið við Sölva Sveinsson, fyrrverandi skólameistara Verslunarskóla Íslands og Fjölbrautaskólans við Ármúla um að hann taki við stöðu skólastjóra frá næsta hausti.

Sölvi er sagnfræðingur að mennt, lauk Cand. Mag. prófi frá Háskóla Íslands árið 1980. „Hann á að baki fjölbreyttan og glæsilegan feril sem kennari og skólameistari. Hann hóf feril sinn í Hagaskóla þar sem hann kenndi samhliða námi á áttunda áratugnum, en hann kenndi einnig um tíma við Laugalækjaskóla. Sölvi réðst að Fjölbrautarskólanum í Ármúla 1979. Þar tók hann við stöðu aðstoðarskólameistara árið 1987 og varð skólameistari áratug síðar. Árið 2005 varð Sölvi skólameistari Verslunarskóla Íslands," segir í tilkynningu frá skólanum en þeirri stöðu gegndi hann til ársins 2007 þegar hann tók að sér að stýra undirbúningi að stofnun Listmenntaskóla. Hann hefur starfað í framhaldsskóladeild menntamálaráðuneytisins frá 2008.

Þá segir að stjórn Landakotsskóla hafi unnið að því í vetur að styrkja sérstöðu skólans og móta stefnu hans til lengri tíma. Landakotsskóli leggur áherslu á kennslu í tungumálum og listum en ætlunin er að efla einnig kennslu í raunvísindum og flétta saman við þær áherslur sem fyrir eru. Markmið skólans er að bjóða upp á áhugaverðan valkost í grunnskólaflóru borgarinnar þar sem skýr sérstaða í skólastarfi fer saman við mikinn metnað fyrir hönd nemenda.

„Reynsla og bakgrunnur Sölva kemur að góðu gagni við mótun skólans til framtíðar og væntir stjórnin mikils af störfum hans. Sölvi tekur við starfinu 1. ágúst næstkomandi," segir að lokum.