Flestir vilja Guðríði sem bæjarstjóra

Guðríður Arnardóttir, oddviti Samfylkingarinnar, nýtur mest stuðnings meðal Kópavogsbúa til að verða bæjarstjóri eftir kosningarnar síðar í mánuðinum. Rúmlega 45% vilja að Guðríður verði bæjarstjóri samkvæmt skoðanakönnunum sem unnin var fyrir Samfylkinguna.

Könnunin sem gerð var dagana 16.-21. apríl, mældi það fylgi sem núverandi oddvitar flokkana í Kópavogi hafa til að gegna bæjarstjóraembættinu á næsta kjörtímabili. Af þeim sem tóku afstöðu til oddvitanna fjögurra völdu 44,5% Guðríði, 33,9% Ármann Kr. Ólafsson Sjálfstæðisflokki, 14,6% Ólaf Þór Gunnarsson VG og 7% framsóknarmanninn Ómar Stefánsson.

Gunnar oft nefndur

Einnig var gefinn kostur á að nefna aðra en núverandi oddvita og var Gunnar Birgisson fyrrverandi oddviti Sjálfstæðisflokksins oftast nefndur. Aðrir sem nefndir voru hlutu óverulegt fylgi. 3,9% aðspurðra vilja að ráðinn verði ópólitískur bæjarstjóri.

Úrtak í könnuninni var 800 einstaklingar úr þjóðskrá á kosningaaldri og til heimilis í Kópavogi. 487 svör bárust og var svarhlutfall því 61,8%. Það var rannsóknarfyrirtækið Fortuna sem framkvæmdi könnunina

Kosið verður til bæjarstjórnar í Kópavogi þann 29.maí næstkomandi. Kópavogur er annað fjölmennasta sveitarfélag landsins á eftir Reykjavík. Sjálfstæðisflokkurinn og Framsóknarflokkurinn hafa hafa meirihluta í bæjarfélaginu síðastliðin 20 ár.