„Ég ákvað að breyta starfsheitinu í magadansmær af því það er enginn að fara að leita að útvarpskonu til að taka að sér skemmtileg verkefni. Ég var áður skráð sem plötusnúður en er orðin mettuð af verkefnum á því sviði og ákvað þess vegna að breyta,“ útskýrir Margrét Erla Maack, útvarpskona á Rás 2, hefur breytt starfsheiti sínu í símaskránni og kallast nú magadansmær. Hún segist hafa staðið í ströngu til að fá starfsheitið í gegn þar sem starfsmenn símaskrárinnar hafi talið að um grín væri að ræða. „Magadansmær var ekki löglegt starfsheiti og þau héldu að þetta væri eitthvað grín, sem það er ekki því ég hef stundað magadans í fimm ár og kenni meðal annars í Kramhúsinu. Þegar ég fór svo á stúfana sá ég að það voru nokkrar ninjur í símaskránni, fimm geimkúrekar, ljónatemjarar og þó nokkrir snillingar. Það endaði með því að ein yndisleg kona sem vann þarna hafði samband við ritstjóra símaskráarinnar og nú er þetta komið í gegn.“
Margrét Erla er enn sem komið er eina magadansmærin á landinu en telur að þeim muni fjölga innan skamms því hér séu margar konur sem stundi magadans. Hún segist þó ánægð með að hafa loks fengið starfsheitið í gegn. „Ég er mjög ánægð og líka fegin því ég óttaðist í fyrstu að ég mundi fá símhringingar frá einhverjum dónakörlum, en þeir hafa alveg látið mig í friði.“ -sm
