Foreldrar áhyggjufullir vegna barnaníðings

Foreldrar í Breiðholtsskóla hafa verið boðaðir til fundar vegna áhyggna um að Ágúst Magnússon, margdæmdur barnaníðingur, sé fluttur í hverfið. Foreldrar í hverfinu sem fréttastofa ræddi við kvarta undan skorti á upplýsingum og úrræðum.

Ágúst Magnússon er einn alræmdasti barnaníðingur Íslands. Hann var árið 2004 dæmdur í fimm ára fangelsi fyrir kynferðisbrot gegn fimm drengjum en hann hefur síðar viðurkennt að hafa brotið gegn allt að átta drengjum til viðbótar. Auk þess vakti það mikinn óhug þegar Ágúst var gripinn við að reyna að komast í kynferðisleg kynni við tálbeitu fréttaþáttarins Kompáss en tálbeitan þóttist vera 13 ára stúlka. Ágúst var á þeim tíma vistaður á áfangaheimilinu Vernd.

Ágúst hefur undanfarna mánuði verið á reynslulausn og fréttastofa hefur nokkrum sinnum fengið ábendingar og athugasemdir um dvalarstaði hans. Nú telja nokkrar mæður í Breiðholti sig hafa upplýsingar um að Ágúst sé fluttur í hverfið sitt og þær hafa af því miklar áhyggjur.

Mæðurnar hafa skipulagt sig og haft samband við foreldrafélagði og skólastjórnendur en fundur veriður haldinn með foreldrum um málið í Breiðholtsskóla eftir viku þar sem samtökin Blátt áfram muni halda erindi en lögregla ætlar einnig að koma á fundinn. Þetta eru viðbrögð þeirra við þeim skorti á upplýsingum og úrræðum sem þær upplifðu eftir að þær fengu tíðindin af því Ágúst væri kominn í hverfið.

Mæðurnar eru augljóslega áhyggjufullar enda er það mat sálfræðings Ágúst sé haldinn alvarlegri barnagirnd og þrálátum kynórum. Það var einnig mat sálfræðingsins að Ágúst ráði ekki við þessar kenndir og því sé hætta á því að hann brjóti af sér á ný.