Snorri í Betel: Skilnaðurinn alvarleg mistök

„Ég er alltaf á móti skilnaði," segir Snorri Óskarsson, forstöðumaður Hvítasunnukirkjunnar á Akureyri, spurður út í yfirlýsingu Gunnars Þorsteinssonar, forstöðumanns Krossins og eiginkonu hans, Ingibjörgu Guðnadóttur.

Hjónin tilkynntu um skilnaðinn í gærkvöldi og sögðu ástæðuna vera tímaleysi annarsvegar og svo stefndi í að annað hvort þeirra þyrfti að fórna starfi og hugðarefnum. Þess vegna ákváðu þau að skilja.

Snorri, sem áður var oft kenndur við Betelsöfnuðinn í Vestmannaeyjum, segir að það megi vel vera að það séu gildar ástæður fyrir skilnaði en sjálfur hafi hann alltaf haft trú á því að það væri hægt að laga málin.

„Jesú sagði að ástæðan fyrir skilnaðinum væri harðúð hjartans," segir Snorri sem þykir til að mynda að ný þýðing Biblíunnar, þar sem búið er að taka út hart orðalag guðs gagnvart hjónaskilnuðum - en þar sagði beinlínis að guð hataði skilnaði - væri til marks um nýjan hugsunarhátt fólks og mildari afstöðu til skilnaða.

Aðspurður hvort væntanlegur skilnaður Gunnars í Krossinum sé til marks um meira umburðarlyndi meðal þess sem má kalla harðlínu trúfélaga svarar Snorri: „Alls ekki."

Hann bætir svo við: „Varðandi Gunna og Ingu þá eru þetta alvarleg mistök."

Snorri hringdi í Gunnar þegar tilkynningin birtist á heimasíðu Krossins um skilnaðinn. Hann segist hafa rætt við hann og viðrað sína afstöðu í málinu.

Spurður hvort það sé ekki bara eðlilegt að þau skilji þar sem Gunnar starfar hér á landi en sjálf hefur Ingibjörg fengist við verkefni í Bandaríkjunum spyr Snorri á móti: „Þurfa þau endilega að skilja? Geta þau ekki bara mæst á miðri leið, til að mynda í Grænlandi?"

Spurður hvort skilnaðurinn hafi alvarleg áhrif eða veiki stöðu Gunnars sem trúarleiðtoga í Krossinum segir Snorri að hann telji persónulega að Gunnar hafa skotið sig í fótinn með þessari ákvörðun.

„Með þessu hefur hann komist að þeirri niðurstöðu að menn þurfi ekki að vera harðir af sér og ákveðnir. Hann er að segja að það megi sveigja út af og það er slæm niðurstaða," segir Snorri en Krossinn er það sem má kalla bókstafstrú og því þykir Snorra skilaboð Gunnars sérstök.

En Snorri er langt því frá búinn að missa trúna - á Gunnari og Ingibjörgu það er að segja: